khamosh pratibimb
O mere pratibimb
tu kyon nahi mujhe kuchh batlata hai
aise bhavheen chehre se
mujhe kyon takta jaata hai
bahuton ke sukh mein dukh mein
tera chehra badla tha
teri aankhon ne unke riste ghaavon ko sehla tha
tera honthon ne unki khamoshi ko pada tha
aur fir usee khomoshi ka arth bhi samjhaya tha
ab ek prashanchinha lagaye
mujhe kyon takta jaata hai
tu mujhe kyon nahi kuchh samjhata hai
dekh mujhse to tu kuchh chhipa nahi sakta
kya toone jo arth doosron ko samjhaye
wo khud kabhi nahi samjhe
toone wahi kaha jo unhone sun na[सुनना] chaha tha
lekin fir itna roop kyon badalta raha
kyon tu auron ke pratibimb mein dhalta raha
ab mere chehre ko kyon taak raha hai
kya ye wo nahi jo tu jeeta aa raha hai
kyon teri nazre anjaan banti hain
meri nazron se takra kar
kab tak bhagte rahenge hum
ek doosre se ghabrakar
ab to tujhe bhi mera chehra dekhkar
apne bhaav badlne honge
mere riste ghaavon par
apni nazron ke malham lagane honge
meri khamoshi ko apne honthon se
mujhe sunana hoga
ab tu mujhse jaan pehchaan kar le
tujhe mere saath hi jeewan bitana hoga